لاہور ، وزیراعلیٰ پنجاب مریم نواز نے جشن آزادی کی مناسبت پر صوبے بھر میں صفائی ستھرائی کے بہترین انتظامات کی ہدایت دی ہے اور تمام محکموں کو جشن آزادی کی تقریبات کے دوران عوام کو بہترین سہولیات فراہم کرنے کا حکم دیا ہے۔ وزیراعلیٰ نے فیمیلیز کی آمد کے پیش نظر عوامی مقامات پر سیکیورٹی اور ٹریفک کے بہترین انتظامات یقینی بنانے کی بھی ہدایت کی۔
وزیراعلیٰ مریم نواز نے پنجاب بھر میں ضلعی انتظامیہ کو جشن آزادی کی تقاریب، ریلیوں سمیت دیگر تقاریب میں شہری تنظیموں کی بھرپور معاونت کرنے کی ہدایت کی۔ پنجاب بھر کے شہروں اور دیہات میں جشن آزادی کے رنگ قوس و قزح کی مانند بکھر گئے۔ شہروں اور دیہات میں عوام کا گھروں پر پرچم لہرانے کا سلسلہ جاری ہے۔ گاڑیوں، موٹر سائیکلوں، رکشوں، ٹرالیوں اور ٹرکس کو بھی خوبصورتی سے سجایا گیا۔ سرکاری اور نجی عمارتوں، پارکس، چوک چوراہوں، بازاروں، شاہراہوں کو بھی جھنڈوں اور جھنڈیوں سے سجانے کا سلسلہ جاری ہے۔ برقی قمقموں اور چراغاں سے علاقوں اور عمارتوں کا حُسن دوبالا ہوگیا۔ لاہور، راولپنڈی، مری، کوٹلی ستیاں، جھنگ، لیہ، سیالکوٹ، مرید کے، شیخو پورہ، گوجرانوالہ، جہلم، چکوال اور اٹک میں آرائش و زیبائش کے خوبصورت مناظر نے شہریوں کو تفریح کا موقع بھی فراہم کردیا۔ فیصل آباد، خانیوال، بہاولپور، ملتان، بھکر، منڈی بہاءالدین اور سرگودھا میں بھی بازار، گلیاں، راستے اور چوراہے سجایئے گئے۔ قومی یادگاروں پر بھی چراغاں کیا گیا۔ شام ہوتے ہی شہری چراغاں اور رونق دیکھنے سڑکوں پر نکل آتے ہیں۔
