لاہور ہائیکورٹ نے حسان نیازی کی ملٹری کسٹڈی، ملٹری کورٹ کی کارروائی اور کورٹ مارشل کے خلاف دائر درخواست پر وفاقی حکومت کو نوٹس جاری کرتے ہوئے سماعت 16 ستمبر تک ملتوی کر دی۔ جسٹس سید شہباز رضوی اور جسٹس طارق محمود باجوہ پر مشتمل دو رکنی بینچ نے اس درخواست کو اعتراض کے ساتھ سنا، جبکہ رجسٹرار آفس نے کمانڈنگ آفیسر کے مصدقہ آرڈر کی نقل نہ لگانے اور متعلقہ فورم سے رجوع نہ کرنے پر اعتراضات اٹھائے۔ حسان نیازی نے اپنے وکیل سینئر قانون دان فیصل صدیقی کے ذریعے مؤقف اختیار کیا کہ 9 مئی کے واقعے کے بعد انہیں سویلین عدالت میں پیش نہیں کیا گیا اور تھانہ سرور روڈ پولیس نے غیر قانونی طور پر عدالتی حکم کے باوجود ان کی کسٹڈی ملٹری حکام کے حوالے کر دی۔ درخواست میں استدعا کی گئی ہے کہ انہیں ملٹری کسٹڈی میں دینے کا 17 اگست 2023 کا نوٹیفکیشن کالعدم قرار دیا جائے، ملٹری کورٹ کی کارروائی اور کورٹ مارشل کو غیر قانونی قرار دیا جائے اور عدالت حکم دے کہ انہیں جیل سے رہا کیا جائے یا انسدادِ دہشت گردی عدالت کے سامنے پیش کیا جائے۔
0
