پاکستان تحریک انصاف (پی ٹی آئی) کے بانی چیئرمین عمران خان کی ہدایت پر قومی اسمبلی کے بعد سینیٹ میں بھی پارٹی ارکان نے قائمہ کمیٹیوں سے استعفے دینا شروع کر دیے ہیں۔
ذرائع کے مطابق سینیٹر ذیشان خانزادہ اور دوست محمد نے اپنی اپنی قائمہ کمیٹیوں کی رکنیت سے استعفیٰ چیئرمین سینیٹ کو ارسال کر دیا۔ ذیشان خانزادہ نے احتجاجاً اوورسیز پاکستانی، خارجہ امور، فنانس اینڈ ریونیو، کامرس اور نجکاری سمیت پانچ کمیٹیوں کی رکنیت چھوڑ دی۔ دوست محمد نے بھی حکومتی یقین دہانیاں، انسانی حقوق، فوڈ سیکیورٹی، غربت مٹاؤ اور ریلوے کی کمیٹیوں سے استعفیٰ دیا۔
اس سے قبل سینیٹر محسن عزیز اور اعظم خان سواتی بھی پارٹی کی ہدایت پر کمیٹیوں سے الگ ہو چکے ہیں۔ اعظم سواتی نے اقتصادی امور، صحت، قانون و انصاف اور قواعد و ضوابط کی کمیٹیوں سے استعفیٰ دیتے ہوئے کہا کہ موجودہ حالات میں کمیٹیاں بے سود ہوچکی ہیں اور یہ اقدام آئین و قانون کی حکمرانی کے لیے احتجاج ہے۔
پی ٹی آئی کے حمایت یافتہ سینیٹر مرزا محمد آفریدی نے بھی عمران خان کے حکم پر کامرس، صنعت و پیداوار، تعلیم، توانائی اور بین الصوبائی رابطہ کمیٹی کی رکنیت سے استعفیٰ دیا۔یاد رہے کہ اس سے قبل قومی اسمبلی میں پبلک اکاؤنٹس کمیٹی کے چیئرمین جنید اکبر سمیت 51 ارکان پہلے ہی اپنے استعفے اسپیکر قومی اسمبلی کو بھجوا چکے ہیں، تاہم اسپیکر ایاز صادق نے اب تک ان پر کوئی کارروائی نہیں کی۔ حکومت کی جانب سے بھی اسپیکر کو سنی اتحاد کونسل کے ارکان کے استعفے منظور نہ کرنے کی درخواست دی گئی ہے۔
—
